09 Nov 2022

Banana ba kgotlhaditswe go nna le mowa wa go itirela le go batla methale mengwe ya go itlhamela mebereko gore ba nne le letseno.

Kgothatso e, e dirilwe ke monana, Rre Peter Molefane mo Serowe bosheng mo potsolotsong le BOPA, a tlhalosa fa metlhala ya khumo e le mentsi e tlhoka balati.

Rre Molefane yo o dingwaga tse di masome mararo, o tlhalositse fa e rile morago ga go senyegelwa ke mmereko kwa Gaborone mo khamphaning ya CAT e e baakanyang dikatakata, a lemoga fa go le boima go bona tiro mo malatsing a gompieno, a boela gae mo Serowe go iphutha metlhala mme a itshimololela madirelo a tiro ya diatla.

 Madirelo a gagwe a dira dilo tse di farologaneng di akaretsa dinomoro tsa dikoloi, ditilo tsa dipolanka, tse di dirilweng ka dithaere, mantlo a dintsa le tse dingwe.

Rre Molefane a re tiro e ya gagwe ga a e ela sekoleng mme o ithutile fela kwa a neng a ntse a berekela teng.

O ne a supa fa a ne a itshimololela madirelo a ka madi a a neng a a ipoloketse fa a santse a berekela kwa Gaborone.

A re ntswa go ne go se bonolo fa a simolola madirelo ka e ne e le nako ya segajaja sa COVID-19, one a ipolelela gore seemo seo ga se na go phirimisa ditoro tsa gagwe.

A re le fa a bona bareki ba ba nametsang kwa madirelong a gagwe, go na le dikgwetlho tse a lebaganeng le tsone letsatsi le letsatsi jaaka letlhoko la didirisiwa tsa motlakase le go tsaya didirisiwa kgakala jaaka Francistown le Gaborone.

O rotloeditse banana ba Botswana ka bophara go nna le mowa wa go itirela le go ipatlela metlhala e ba ka itshetsang ka yone gore ba tswe mo ditirong tsa borukutlhi le mo ditaging tse di ka ba senyetsang isago.

O ne a tlhalosa fa ditagi le borukutlhi di ka seke di ba ise gope mo botshelong fa ese go baya matshelo a bone mo diphatseng. BOPA