31 Oct 2022

 Dikgang tsa kgokgontsho di tlhalosiwa di le dintsi mo kgaolong-potlana ya Letlhakeng.

Mafoko a, a boletswe ke mogolwane wa mapodisi a Letlhakeng, Assistant Superintendent Lekopanye Molwantwa kwa bokopanong jwa go baakanyetsa letsatsi la mafatshefatshe la borre le le tlaa tshwarelwang  kwa Salajwe Ngwanatsele a le lesome le borobabobedi.

Ass. Supt Molwantwa o tlhalositse gore ba begetswe melato  ya kgokgontsho e le masome matlhano le bone go tloga ka Hirikgong go fitlha Phalane monongwaga.

O tlhalositse fa ba begetswe molato wa go thubetsa e le mebedi, ya go tshosetsa go bolaya  e le metlhano, a go itaya e le mene, ya go dirisa bana ba ba kwa tlase ga dingwaga tse di lesome le borobabobedi mo go tsa tlhakanelo dikobo  e roba bongwe, ya go gobatsa e le meraro, ya go itaya e le mene, le melato ya go itaya mo go botlana e le lesome le botlhano.   

Ass. Supt Molwantwa o supile fa go na le lepodisi le le itebagantseng le dikgang tsa bong le le lengwefela, a bo a rotloetsa borre go bega dikgang tsa bone fa ba kgokgontshiwa.

E ne e rile a amogela baeng kwa tirong eo, mogolwane go tswa kwa ofising ya ga malaodi mme a itebagantse le dikgang tsa HIV/AIDS, Rre Kennedy Dintwe a supa fa kgaolo-potlana ya Letlhakeng e na le batho ba ba amilweng ke mogare wa HIV/AIDS ba le dikete tse tlhano.

Rre Dintwe o boletse fa go na le dikgang tsa go ima ga banana di le masome matlhano le bobedi, a bo a tlhalosa fa go nowa bojalwa thata mo kgaolong-potlana e.

O tlhalositse fa kgaolo e gape e tlhasetswe ke lehuma, a bo a supa fa go nowa phetelela ga bojalwa go baka dikgang tsa kgokgontsho.

Fa a bua ka mefuta ya kgokgontsho Mme Kealeboga Motanyana go tswa kwa Botswana Gender Based Violence and Support Centre, o ne a supa fa go na le kgokgontsgho ya maikutlo, kgokgontsho ya tlhakanelo dikobo le kgokgontsho ya tsa madi.

O tlhalositse fa kgokgontsho ya maikutlo e le go buisa motho yo mongwe mafoko a a nyenyafatsang le a a roganang, a supa fa kgokgontsho e e le botlhoko ka nako e ntsi go sena bosupi.

Mme Matanyana o supile fa kgokgontsho ya tlhakanelo dikobo e le ya go betelela, go tshwara motho a sa rate le fa mogolo a robala bana ba ba kwa tlase ga dingwaga. 

O tlhalosiste fa kgokgontsho ya madi e le fa mokgokgontshi a laola gore madi a dirisiwa jang, go na le gore ba dumalane gore ba ka dira eng ka madi.

O supile fa mokgokgontshi gantsi a le lerato e bile a itse go fitlha mekgwa ya gagwe ka lerato, mo e kareng go buiwa mekgwa ya gagwe ope a seke a dumele.

Fa a lebogela tiro eo, mothusa mokwaledi wa khansele-potlana ya Letlhakeng  Rre Tumelo Seboko o ne a supa fa dikgang tsa kgokgontsho di le dintsi, a supa fa go na le kgang ya gore mosadi ga a kake a nna kgosi fela ka gore ke mosadi.  

Rre Seboko o ne a supa fa basadi ba supile fa ba na le bokgoni jwa go etelelela morafe pele. BOKHUTLO