27 Oct 2022

Ba khamphani ya metsi ya Water Utilities Corporation (WUC) kwa Serowe ba ngongoregela tshenyo ya dipompo tsa metsi le go tlhoka go dirisa ditirelo tsa kgopho ya metsi a a leswe sentle ga banni ba koo.

Fa a bua kwa bokopanong jwa WUC le ba-na-le seabe mo go tsa tiriso ya metsi ka Laboraro kwa Serowe, mogolwane wa tsa kanamiso ya metsi kwa kgaolong ya Serowe, Rre Moabi Lebakeng o ne a re go makgetho a mantsi diphaephe tse di anamisang metsi di senngwa e bile di bonala gore di ne di itewa ka sengwe gore di ntshe metsi di nose leruo, bogolo jang kwa dikgweng kwa go nang le leruo teng.

A re diphaephe tse di felela di dira gore kanamo ya metsi mo metseng e kgoreletsege ka ba a bo ba santse ba le mo tirong ya go di baakanya.

O supile gape gore mo moalong wa diphaephe tsa kgopho ya metsi a a leswe, go nna le tshenyo mme se se dire gore metsi a a leswe a kgoreletsege go ya kwa a tshwanetseng go ya teng.

Rre Lebakeng a re e a re ba baakanya diphaephe tsa kgopho ya metsi a a leswe, ba rakane le tse di farologanyeng jaaka matlalo a dikgomo, mesangwana ya basetsana, diaparo, mmu le matlakala ka go farologana.

A re bangwe ba latlhela mesangwana ya basetsana mo matlwaneng a boitiketso a a dirisang metsi, e bo e felela e kgoreletsa go tsamaya ga metsi a a leswe go ya matangwaneng, fa bangwe ba latlhela matlakala fa metsi a a letswe a dutlang teng.

Rre Lebakeng o supile fa marekisetso mangwe a dijo le mangwe matlhabelo kwa Serowe, e le bangwe ba ba kgotlelang diphaepheng tsa kgopho ya metsi a a letswe ka go tsholola mafura, moswang le madi.

A re ka tsamaiso, marekisetso a dijo le matlhabelo di tshwanetse di nne le ditlamelo tse di ntshang madi, moswang le mafura pele ga metsi a a leswe a tshelwa mo diphaepheng tsa kgopho leswe mme ga di yo.

Rre Lebakeng o ikuetse mo banning ba Serowe ba ba inaakantseng le tshenyo ya diphaephe tse di tsamaisang metsi go emisa nokgwa oo ka o kgoreletsa kgopho ya metsi a a leswe le kanamiso ya metsi a a nowang.

O kopile setshaba go emisa go latlhela tse di sa tshwanelang mo diphaepheng tsa kgopo ya metsi a a leswe.

Mo go tse dingwe, Rre Lebakeng o supile fa selekanyo sa 70 per cent ya metsi a a nowang kwa Serowe e le a a tswang mo phaepheng ya North South Carrier (NSC) fa selekanyo sa 30 per cent, se tswa kwa didibeng.

Rre Lebakeng o lekodisitse phuthego eo fa e ne ya re ka Phatwe ba khamphani ya metsi ba seka ba kgona go anamisa metsi a a lekaneng kwa Serowe, ntateng ya go thubega ga phaephe e e tsisang metsi mo Serowe e tswa Palapye.

A re e ne ya re morago ga go baakanya phaephe eo, ga nna le tshenyo ya phaephe ya metsi mme ga tsaya sebaka metsi a sa aname sentle mo motseng.

Le fa go ntse jalo a re seemo jaanong se boetse mannong.

Rre Lebakeng a re lenaneo la go gokekelela kgotla ya Mannathoko kwa Serowe le metse ya Paje le Mabeleapodi mo phaepheng ya metsi e e tswang bokone e ya borwa e weditswe mme e na le dikgwetlho di le dintsi.

A re konteraka e e neng ya thapiwa go dira lenaneo leo e ne ya dira diphoso di le dintsi mme mo makgethong a mantsi diphaephe di a thubega di bo di baakanngwa, ka jalo, go nne le letlhoko la metsi kwa Paje le Mabeleapodi.

A re kwa Dimajwe, banni ba ne ba anwa mo didibeng di le pedi mme ga lemotshega fa di kgotlelesegile.

A re mo nakong eno motse oo o tsisediwa metsi ka ditanka mme WUC e mo lenaneong la go aga tanka ya metsi kwa motseng oo e bile ba setse ba bone madi a go dira jalo.

Rre Lebakeng o supile fa WUC e na le kgwetlho ya diphaephe tse di anamisang metsi mo kgaolong ya Serowe ka di le dikgologolo e bile di tlhokana le go ntshafadiwa.

A re ba tsentse kopo ya madi gore ba kgone go di tlhabolola.

O supile fa WUC e na le kgwetlho e nngwe ya tshenyo ya dipompo tsa metsi tsa setshaba, go utswiwa ga megala ya motlakase mo go felelang go kgoreletsa kanamiso ya metsi le go dirisa madi a mantsi go baakanngwa tse di sentsweng. BOKHUTLO