25 Oct 2022

Kgosi Gillard Letsholathebe wa Letsholathebe mo kgaolong ya Bokone Botlhaba o tlaa bolokwa kgwedi eno e tlhola masome a mabedi le boferabongwe kwa Letsholathebe.

Kgosi Letsholathebe o tlhokafetse morago ga go lwala ka lobakanyana, a le dingwaga di le masome marataro le borataro.

Mo potsolosong le BOPA, morwadia Kgosi, Mme Unaswi Mokgethi a re Kgosi Letsholathebe o tlhokafetse kgwedi eno e le lesome le boferabobedi kwa kokelong ya Nyangabgwe kwa Francistown.

Mme Mokgethi o tlhalositse fa Kgosi Letsholathebe a tlhomilwe Kgosi ya Letsholathebe ka ngwaga wa 2006, morago ga go tlhokafala ga ga rraagwe ebong Kgosi Thomas Letshothebe ka 2005.

A re pele ga a tlhongwa mo setilong, Kgosi Letsholathebe o ne direla kwa moepong wa Afrika Borwa gammogo le kwa sesoleng sa Botswana.

Mokwaledi wa makgotla a Setswana mo kgaolong ya Bokone Botlhaba, Rre Segopotso Sakwape o boletse fa loso lwa ga Kgosi Letsholathebe, e se tatlhegelo ya ba lelwapa fela, mme lephata la gagwe le kgaolo ya Bokone Botlhaba ka kakaretso di latlhegetswe ke mogaka yo o neng a rata e bile a rotloetsa kagiso bobe.

A re mo godimo ga moo, Kgosi Letsholathebe e ne e le motho yo o bonolo, a dira tiro ya gagwe ka boineelo le ka bopelotelele, mme e bile a tlotla nako fela thata.

Rre Sakwape a re o simolotse go bereka le Kgosi Letsholathebe ka 2019, fa a goroga mo kgaolong ya Bokone Botlhaba, mme go fitlha a tlhokafala jaana, ga a ise a nne le kgopakgopano epe le ene.

Kgosi Letsholathebe o tlogela bana ba le barataro, basimane ba le bane le basetsana ba le babedi, bommonawe ba le babedi, monna le mosadi mmogo le batsalwa le ene ba le bararo. Bokhutlo