13 Oct 2022

Matlo a batlhoki, a mabedi a agiwang kwa metseng ya Ramokgonami le Seleka, a solofetswe go wediwa pele ga ngwaga ono o ya fifing.

Se se senogile ka Labobedi, mo loetong la ga Mothusa Tona wa Dikgalo le Tlhabololo Magae, Mme Talita Monnakgotla, yo o neng a ile go lekola ka fa tiro eo, e tsweletseng ka teng le go itkutlwela ka dikgwetlho tse di e lebaneng.

Matlo ao, a dikamore tsa borobalo tse pedi, a lopile madi a fetang P100 000, nngwe le nngwe, mme a agiwa ke badiri ba Ipelegeng ba tshwaragane le ba CITF.

Tona a re maikaelelo a lephata ke go tlhabolola motho ka go bona gore mongwe le mongwe o nna mo bonnong jo bo siameng le gore o robala a jele.

A re ba ka kgona maikarabelo a bone ka go ruta batho go itirela gore ba kgone go itshetsa, a tlatsa ka gore ke gone ka moo ba duleng ka lenaneo le go rutuntsha batho  gore ba fetole ka fa ba akanyang ka teng le gore ba ipelege.

Mme Monnakgotla a re lenaneo le lesha la Ipelegeng le ratiwa ke banana thata ka gore ba batla ditlankana, gore morago ba di dirise go ipatlela ditiro mo dikonterakeng.

Mothusa Tona o ne a gatelela gore CITF e tlile go thusa go tlhabolola metse le dikitso.

O rotloeditse badiri ba khansele-potlana ya Mahalapye go netefatsa gore matlo ao, a agiwa ka madi a sa feteng aa abetsweng.

Fa a lekodisa Mothusa Tona ka tsa khansele-potlana ya Mahalapye, modulasetilo wa yone, Rre Bantlhasetse Merementsi o supile fa e lebanwe ke letlhoko le le letona la ditlamelo jaaka ditsela le dikoloi.

Rre Merementsi a re letlhoko leo, le kgoreletsa bodiredi mo go ntsheng maduo.

O ne a lebogela Mme Monnakgotla go ipha sebaka go lekola ka fa tiro e tsweletseng ka teng le go ikutlwela dikgwetlho tse badiri ba khansele-potlana, gammogo le baagi, ba lebaneng le tsone mo go e wetseng.

Fa a lekodisa Mothusa Tona ka kago ya matlo ao, Mokwaledi wa Khansele-potlana ya Mahalapye, Mme Gomolemo Moepeng, o tlhalositse fa tiro eo e simolotse ka kgwedi ya Motsheganong monongwaga.

Mme Moepeng o boletse fa ntlo e agelwang Mme Obonye Moroka, yo dingwaga tse 54 kwa Seleka, e setse ka seelo sa 40 per cent gore e wediwe, fa e e agelwang Mme Onalenna Phillimon wa dingwaga tse 42 ko Ramokgonami, yone e setse ka seelo sa 32 per cent gore e wediwe.

Banni ba Ramokgonami le Seleka ba galeleditse puso mo go tsweng ka Lenaneo le lesha la Ipelegeng, ba re le tla thusa go tlhama ditiro le go fokotsa lehuma. BOKHUTLO