09 Oct 2022

Go botlhokwa go somarela ngwao go netefatsa gore ga e nyelele.  

Se se builwe ke mongwe wa barulaganyi ba moletlo wa MotswAfrika Mahalapye Arts and Cultural Festival 2022, Rre Hosiah Motlhalawapitse mo potsolosong bosheng.

“Maikaelelo a rona ke go tshwara moletlo o ngwaga le ngwaga go tsosolosa ngwao mo Mahalapye. Fa o ka ela tlhoko mo Mahalapye ga gona moletlo o e leng gore re ka ikgantsha ka one le go o dirisa go rutuntsha banana ka ngwao tsa rona tse di farologaneng ka motse wa rona ele   makgatlhanela thapong,” a tlhalosa.

 Rre Motlhalawapitse a re merafe ee saleng e thibelela mo Mahalapye e akaretsa BaXhosa, Bakaa, Bakalaka, Baherero le Bangwato. 

Ka moletlo o, a re ba ikaeletse gape go ruta, bogolo jang bana ngwao ee nonneng ya merafe ya Mahalapye.

Leina la MotswAfrika,  Rre Motlhalawapitse a re ba le tlhamile ba patagantse maina a mabedi, e bong Motswana le MoAfrika, go supa gore ke Batswana pele e nna ma Afrika.

A re ba sale ba ba rulaganya moletlo o go tloga ka 2014, mme ka maswabi ka ngwaga wa 2020 ba ne ba retelelwa ke go diragatsa maikaelelo a bone a go o simolodisa sentle  ka lebaka la tlhagogo ya segajaja sa COVID-19.

Le fa gontse jalo, a re morago ga gore puso e bulele go tshwarwa ga meletlo, ba ne ba seka ba itsapa mme ba tswelela ka kanamiso ya moletlo o gore batho ba nne ba itse ka one. 

Maikaelelo, a re ke go tshwara moletlo o Matlhatso a bofelo a kgwedi ya Moranang, ngwaga le ngwaga.

Le ntswa ba kopane le dikgwetlho tse di farologaneng jaaka go tlhoka barotloetsi ka palo e nametsang, Rre Motlhalawapitse a re mo ngwageng ono ba thusitswe ba Real Tea, Kgalagadi Breweries Limited (ka Chibuku) le Botswana Agricultural Marketing Board. 

O supile boitumelo ka batho ba ba etleeditseng ka go reka dithekethe tsa moletlo wa bone le go o tsenelela.

Ka tshologelo ya moletlo o, e ne e le kwa tlase, o ikuetse mo bagwebing gore ba ba rotloetse ga mmogo le banni ba Mahalapye le Batswana ka kakaretso, bogolo jang banana.

Moletlo o, o akaretsa kapari ya ngwao, mmino wa Setswana le poko, dijo le dino tsa setso, go ithuta puo tse di farologaneng tsa merafe le metshameko ya bogologolo ka go farologana.  BOPA