16 Sep 2022

Lephata la ditsela le kopilwe go tsibogela seemo sa ditsela tse di kopanyang metse mo kgaolong ya Nhabe pele ga paka ya dipula e goroga.

Fa ba akgela mo pegong ya modulasetilo wa khansele ya bokone bophirima, makhanselara ba ngongoregile ka seemo sa ditsela, se ba reng se ngomola pelo ntswa kgaolo ya bone e le ya bojanala.

Ba re lephata ga le dire go lekane go tokafatsa ditsela tse di kopanyang metse jaaka ya Shorobe-Khwai, Mohembo-Gudingwa, Nokaneng-Xaixai tse di mo seemomg se se maswe.

Makhanselara a kopile lephata go fefogela go gopa ditsela tseo ba tlatsa ka gore seemo sa tsone se ka koba bajanala fa se sa potlakelwe.

Mokhanselara wa kgaolo ya Qangwa/Xaixai, Rre Lelejwang Sokwe are tsela ya Nokaneng-Xaixai le ya Nokaneng-Shakawe e dirisiwa thata ke bajanala ba ba etelang magaga a Cwhihaba le ba ba tlolelang kwa Namibia ka kgoro ya Dobe. Are ka nako ya dipula, tsela ya Nokaneng-Shakawe e e dirisiwang ke bajanala ba ba tsenang mo makgobokgobong a Okavango e fetoga megobe ntateng ya dikhuti tse di mo go yone. 

Mokhanselara wa kgaolo ya Bojanala, Rre Luke Motlaleselelo o ne a supa fa tsela ya Mohembo-Gudigwa le yone e le borai mo matshelong a badirisi ba yone.

 A re diphologolo tsa naga di gakatsa seemo ka jaana di gobeya mo tseleng mme di felela di baka dikotsi, a tlatsa ka gore se se tlhomolang pelo ke gore beng ba dikoloi ga ba bone dikatso dipe fa diphologolo di ba senyeditse.

O ne a supa sekai ka tiragalo ya bosheng e mo go yone ditlou di neng tsa tlhasela koloi nngwe tsa e thuba, fa tlou nngwe e ne ya tlhasela koloi ya setshaba mme beng ba dikoloi tseo ba dule fela ba iphotlhere.

Rre Motlalelselo a re nako e tsile ya gore lephata le le maleba le sekaseke melawana gore go nne le ditsetlana tse di sireletsang le go atswa bao ba ba senyediteweng ke diphologolo tsa naga.

A re melawana ya gompieno e papametse gore ga e atswe dithoto tse di tsamayang, mme a supa fa e tlhoka go sekwasekwa.

Mokhanselara wa Sankoyo/Shorobe, Rre Oabile Chombo o ne a supa fa tsela ya Shorobe-Khwai e na le dingwaga di le masome a mane e ntse e gopiwa, e tshelwa kerabole . Are tsela eo ga e tsamaege fa dipula di na.

Mokhanselara Motlagomang Mmaochadza  ene o ne a lela ka leswe la lehuti ya matlakala kwa Gumare a kopa gore seemo se potlakelwe ka jaana lehuti leo e le mo matlhong a batho.

Mo dikgannyeng tse dingwe, mokhanselara o o itlhopetsweng, Rre Bareetsi Bogaisang o kopile puso go tsibogela seemo kwa lecheng la Ngami ,are barui ba felelwa ke leruo ka ntlha ya go tshwarwa ke seretse. BOKHUTLO