28 Aug 2022

Baikopanyi ba ba thusang mapodisi go lwantsha borukutlhi mo kgaolong ya Kweneng ba ne ba abelwa dietsele kwa Letlhakeng ka Labone.

Fa a amogela baeng kwa tirong eo, mothusa kgosi ya Letlhakeng Kgosi Tumelo Puleng, o supile fa kgaolo ya Kweneng e aperwe ke borukutlhi, a re bosheng dirukutlhi di thubile motshine wa banka ya Access o le mosha go tsenngwa kwa motseng oo.

Kgosi Puleng o tlhalositse fa  baikopanyi ba ba fiwang dietsele ba le botlhokwa ka jaana ba thusa mapodisi go dira tiro.

Mothusa kgosi ya Bakwena Kgosi Lawrence Mhaladi o ne a kopa Motswana mongwe le mongwe go tsaya karolo mo go lwantsheng borukutlhi.

O supile fa mapodisi ba ka seke ba kgone go lwantsha borukutlhi ba le nosi, mme a kopa botlhe go ema ka dinao go thusa.

Mothusa kgosi o ne a tlhalosa fa borukutlhi jo bo ka kgoreletsa maiteko a ga Tautona Dr Mokgweetsi Masisi a go ngokela babeeletsi go tla mo lefatsheng leno.

O kopile Batswana go ema ka dinao go fa bosupi fa go tlhokafala, a bo a ba kopa  gape go tswa mo mokgweng wa segologolo wa go batla go ‘jesiwa sengwe’.

O ne a gwetlha dikgosi tsa Mokwena go ntsha lentswe kgatlhanong le borukutlhi, a supa fa kgosi ya Loologane a ne a emisa diletso tse di modumo kwa motseng wa gagwe.

Kgosi Mhaladi o tlhalositse fa Batswana ba tshela botshelo jo ba sa bo tlwaelang jwa go boifa, a bo a supa fa batho ba tlaa tshaba go tla mo lefatsheng leno le le itseweng ka thokgamo.

O kopile baikopanyi gore ngwaga e e tlang kgaolo ya Kweneng e bo e le yone e di gogang kwa pele ka dietsele tsa go lwantsha borukutlhi.

Kweneng mo sepodising e akaretsa Sojwe, Molepolole, Thamaga, Letlhakeng le Takatokwane. BOKHUTLO