15 Aug 2022

Dikgosi tsa kgaolo ya Ghanzi  Borwa le Bokone di gakolotswe go ikgapha mo go inaakanyeng le merero ya tsa sepolotiki ka jaana go le kgatlhanong le molao o tsamaisang bogosi.

Tona wa lephata la Dikgaolo le Tlhabololo Magae, Rre Kgotla Autlwetse o buile jalo mo puisanyong le dikgosi tsa kgaolo ya Ghanzi Borwa le Bokone kwa Charleshill le Ghanzi bosheng.

Tona Autlwetse a re go tsenelela merero ya sepolotiki go ka kgotlelela bogosi, ka ba ka tloga ba retelelwa ke go tsaya ditshwetso tse di maleba.

A re gape go tsena mo polotiking go ka baka gore ba tseye matlhakore fa ba rarabolola dikgang, mme seo se tloge se tsale mowa wa kgaogano ya morafe.

Tona o boleletse dikgosi gore ka fa tshwanelong, dikgosi ke tsone bagakolodi ba puso e seng baganetsi.

Ka jalo, o ne a ba gakolola gore ba na le tshwanelo ya go phadisanya mo maemong a sepolotiki fela fa ba ithotse marapo a bogosi.

Mo go tse dingwe, Tona Autlwetse o ne a kopa dikgosi gore ba iphaphe mo go kubetsanong ka ntlha ya go eletsa maemo a bogosi ntswa ba itse gore letsalo la bogosi le tsamaya jang.

A re mokgwa o, ke one o feleletsang o dira gore go nne le bogosi jwa ditlhopo mme a supa fa ka ngwao ya Setswana, bogosi bo tsalelwa e seng tlhopo.

A re ba itemogetse gore mo metseng mengwe, go nnile le yone tshokamo eo, mo  o fitlhelang bontsi jwa magosi mangwe ba tshwere maemo ao, mme go se maleba e le ka ntata ya yone tlhopho.

A re se o fitlhela se tsala ketsaetsego ka jaana go sena motlhala o papametseng go tlhalosa ditso tsa bogosi jwa teng ka bonokopila.

A re lephata le mekamekana le dikgang tsa go lwela bogosi mme e bile dikgang  dingwe di felela di sekwa kwa makgotleng a ditsheko, selo se a se kgadileng a sa kgwe mathe.
Ka jalo, o ne a ba kopa go kwala mekwalo e e rurifaditsweng ka fa molaong e e supang keletso ya bone ya gore fa ba tlhokafala ba tla tlhatlhamiwa ke bomang.

A re seo, se tla thusa gore bogosi jwa metse ya bone bo seka jwa aparelwa ke dikgang.

Tona a re go ngomola pelo go bona motho yo mongwe a rontshiwa tshwanelo ya bogosi le mororo bo mo lebane, ka jalo a rotloetsa ba ntlo ya bogosi go nna kelelelo go netefatsa gore ba tsamaisa merero ya bogosi ka sentle. BOKHUTLO