05 Jul 2022

Dikgang tsa dipolaano mo kgaolong potlana ya Serowe ga di jese diwelang bogolo jang go dira banana.

Mo potsolosong le mogolwane wa mapodisi a Serowe Superintendent Poloko Oteng o boletse fa ba setse ba gatisitse dintsho di le lesome le bobedi mo Serowe le metse e e mo tikologong ngwaga ono fela.

Supt Oteng o boletse fa dintsho tse, di diragala thata ko metseng ya Tshimoyapula, Thabala, Moiyabana, Malatswai, Mmashoro le Mogorosi.

O tlhalositse fa loso lo lo diragetseng beke eno, ba tshegeditse moithuti wa mosimane wa sekole se segolwane sa Mothamo kwa Moiyabana, wa dingwaga tse di lesome le borataro , yo go belaelwang a tlhabile mongwe wa molekane wa gagwe ka sengwe se se bogale, mme a tlhokafala go ne foo.

A re ba santse ba tshegeditse mmelaelwa, fa ba lekalana le sepodisi le le faphegileng go sekaseka dikgang tsa mohuta oo le santse le sekaseka dikgang tsa teng.

O boletse fa dikgang tsa mohuta oo, di tshwenya fela thata mo kgaolong ya sepodisi sa gagwe. 

O kopile batho gore fa ba na le dikgang tsa diphaphang ba tswanetse go kopa thuso ko go ba ba maleba go ba gakolola le go ba sidila maikutlo. Bokhutlo