03 Jul 2022

Mapodisi a Mahalapye a tlhotlhomisa tiragalo e mo go yone mosetsana wa dingwaga tse di lesome le bosupa, wa kgotla ya Ramarope kwa Kalamare, a neng a dirisiwa ke monna wa dingwaga tse di masome a mararo le bongwe go tswa mo kgotleng eo.

Fa a bua mo potsolotsong bosheng, mookamela mapodisi a Mahalapye, Superintendent Omphile Malemenyane o supile fa mmaagwe mosetsana a tlhalositse fa a ne a lemoga fa ngwana a na le diphetogo mo mmeleng mme fa a botsa mosetsana a supa fa a ne a robala le monna yoo.

O supile fa a ne a begela ba sepodisi ba ba neng ba isa ngwana kwa kokelong goya go tlhatlhobiwa ke ba bongaka mme ba rurifatsa fa a itsholofetse.

Supt Malemenyane a re monna yoo ne a tshwarwa mme ditlhotlhomiso di santse di tsweletse.

Mo tiragalong e nngwe mapodisi a Mahalapye a tshegeditse monna wa dingwaga tse masome a mabedi le boraro wa kgotla ya Dilaene ka molato wa go dirisa ngwana wa dingwaga tse di lesome le botlhano wa kgotla eo mo Mahalapye .

Supt Malemenyane a re selalome se se kopane le mosetsana yoo ko marekisetsong a nnotagi bosigo. O supile fa monna yoo a ne a tsamaya le mosetsana ko a nnang teng morago ga maitiso kwa a fetileng a mo dirisa teng.

Supt Malemenyane a re e ne yare fa ngwana a tsena kwa lapeng motsadi a botsa kwa a letseng teng mme a supa fa a letse ko monneng yoo.

O boletse fa motsadi wa ngwana a ne a begela ba sepodisi go ba thusa ka ditlhotlhomiso.

O tlhalositse fa dikgang tsa go dirisiwa ga bana di tshwenya, a re bana ba ba ko tlase ga dingwaga tse lesome le boferabobedi ga ba ise ba lekane go tlhakanela dikobo ka ke bana ba ba sireleditsweng ke molao.

Mo kgetsing e nngwe, mapodisi a Mahalapye a tlhotlhomisa kgang e mo go yone rre wa dingwaga tse masome a mabedi a neng a fitlhelwa ka setlhatshana se se belaesegang e le motokwane.

Mo potsolotsong, Supt Malemenyane o supile fa mapodisi ba tshwere monna yoo morago ga go mo phuruphutsha ba sena go kopana le ene mo tseleng bosigo. A re setlhatshana se ile go tlhatlhobiwa, mme fa go ka fitlhelwa ele motokwane o tla lebaganngwa molato.

O supile fa rre yo a tswa mo kgotleng ya Parwe mo Mahalapye.

Mo dikganyeng tse dingwe, Supt Malemenyane a re ba amogetse tiragalo ya go thubiwa ga matlo go bo go tsewa dithoto.

A re rre wa dingwaga tse masome a mane le boferabongwe o ne a bega fa a fitlhetse ntlo ya gagwe e thubilwe mo kgotleng ya Mowana mme ga utsuwa materase ,TV, le electronic meter box tse di lopileng madi a kana ka P7 000.

Mo tiragalong e nngwe, a re ntlo e ne ya thubiwa kwa kgotleng ya Mowana mme ga utswiwa palamonwana, decoder le mogala wa letheka wa Lenovo.

O tlhalositse fa dilwana tseo di lopa madi a fetang P6 000.

A re tiragalo eo e begilwe ke rre yo dingwaga tse di masome a mararo le boraro, mme a supa fa ba ise ba tshware ope mo ditiragalong tseo ka bobedi.

Ka jalo, o kopile setshaba go ba thusa ka ditlhotlhomiso.ends. BOPA