30 Jun 2022

Go ne go osha logong go sala molora jaaka ditlhopha tsa mmino wa Polka le Namastaap di ne di iteisanya borathana go ipatlela phatlha kwa makgaolokgannyeng a dikgaisanong tsa bodiragatsi tsa Setshaba tse di tlaa tshwarwang kwa Gantsi ka  Phukwi.

Ditlhopha tse di ne di thulane kwa Tsabong mo Kgalagadi Borwa ka mafelo a beke ka setlhogo se se reng; Dikgwebo tsa Botaki le Bodiragatsi, Tsela ya go Godisa Ditlhabololo le Itsholelo.

Remmogo go tswa Ghanzi se ne sa feta ka tse di tsididi ba longwa serota ke Ales as Mondlek go tswa Khuis, maemo a boraro a gapiwa ke Honey Polka go tswa Kanye fa maemo a bone a tserwe ke Bly Geseen go tswa Khawa.

Mo mminong wa Namastap setlhopha sa Khoesip go tswa Tsabong se ne sa ikgapela maemo a ntlha, maemo a bobedi a ikgapelwa ke Khara Koen go tswa Lokgwabe, setlhopha sa Khobasen go tswa Ghanzi sa ikgapela a boraro fa a bone a gapilwe ke Vastrap kwa Ghanzi.

Molomaganya ditirelo tsa lephata la Tlhabololo Banana, Bong, Metshameko le Ngwao, Rre Moeti Godisamang a re dikgaisanyo tse di tlhamilwe go rotloetsa, go godisa, go tsosolosa ngwao, go amogelana le go lemoga motswako wa ngwao e e nonneng e bile e farologanye mo lefatsheng leno ka bophara.

A re mmino wa Polka o setse o godile go ralala lefatshe fa go tshwanngwa le mo nakong e e fetileng ka ditlhopha tse di neng di gaisana ka 2011 di ne di le tharo mme palo eo e tsholetsegile go ya kwa go masome a mararo fa Namastaap e ne e le nngwe go tswa Lokgwabe mme mo nakong eno di supa.

A re dikgaisano tsa Polka le Namastaap di ne di kopantse badiragatsi go tswa dikgaolong tse di farolganyeng di akaretsa Legare, Bokone Bophirima, Borwa le Kgalagadi/Gantsi.

Rre Godisamang a tlhalosa fa ditlhopha tse nne tse di gaisitseng mo mminong wa Polka le Namastaap di ka ikgapela  P30 000 maemo a ntlha, P25 000 a bobedi, a boraro P22 500 fa a bone e le P20 000 kwa makgaolaganyeng kwa Gantsi.

O ne a supa fa gape mhama wa bodiragatsi, botaki le ngwao o ka nowa moro ka o felela o araba selelo sa letlhoko la ditiro.

 A re bataki le bone ba oba letsogo go tokofatsa matshelo a bone le gone go tlhamela ba bangwe ditiro.

A re lenaneo la ga Tautona la tlhomo ntsha le tlaa thusa mo kgodisong ya dikgwebo tse dipotlana.

O tlhalositse gore bommampodi ba ba tsereng maemo a ntlha ba tlaa ya Gaborone ka malatsi a boitapoloso a ga Tautona mme ba nnelwe dietsele jaaka ba tlaa bo ba natefisa mo meletlong eo.

Mo mafokong a gagwe mongwe wa baatlhodi ba Polka Mme Pana Badenhorst o ne tlhalosa fa mmino oo o godile e bile boleng jwa one bo setse bo le kwa godimo.

A re se se itumedisang ke gore badiragatsi ba setse ba o tsaya tsia, a supa fa ba ne ba tsile dikgaisanyong ba itlhokodiletse go nna bafenyi.

Mme Badenhorst o ne a supa mmino wa Polka kwa tshimolodisong ya one o ne o supa lorato ka jaana o binwa go itumetswe e le tsela nngwe ya go intsha bodutu mme mo nakong eno ba itshetsa ka one.

O boletse fa mo nakong ya gompieno batlhokakutlo le bone ba ne ba tseneletse dikgaisanyo, selo se a supileng fa se supa neelano le kgatlhego e tona mo merafeng e e farologanyeng ka jaana le bone ba dirile bontle ka go ikgapela maemo a  lesome le boraro mo ditlhopheng di le masome a mararo.

Mopalamente wa Kgalagadi Borwa, Rre Sam Brooks o ne a supa fa dikgaisanyo tseo di le botlhokwa ka di gwetlha gore ditlhopha di ipaakanye mo go tseneletseng go sireletsa ditalente tsa bone.

Rre Brooks o ne a gakolola ba ba sa fenyang gore seka ba itlhoboga mme ba ye go baakanya diphoso.

 O ne a kgothatsa ba ba tlaa ntshang tlhogo go ntsha ga tshwene mo legatong le le tlang. BOKHUTLO