26 Jun 2022

Baruti ba dikereke kwa Maralaleng mo Kgalagadi Borwa ba kgothaditse diphuthego le setshaba go itsetsepela ka lefoko la Modimo ka e le lone makgonatsotlhe.

Fa a bua ka maikaelelo a letsatsi leo ka Labone, mokwaledi wa kgosi Mme Gaamangwe Gofhamodimo o ne a tlhalosa fa e le go isa ditebogo kwa Modimong ka thapelo le dikgalaletso go bo o kgonne go tshegetsa setshaba mo mogareng wa Corona o o neng o gaketse mo dingwageng tse pedi tse di fetileng.

A re COVID-19 e ne e apesitse lefatshe kobo ka letshoba, bangwe ba ne ba tlhokafala, fa bangwe ba ne ba falola ka bobi jwa segokgo, e se ka botlhale jwa bone mme e le pabalelo ya Modimo.

A re le le ntswa bolwetsi bo sa ntse bo gaketse, se se nametsang ke gore dintsho di kokobetse, selo se a supileng fa Modimo o tshwanelwa ke go galalediwa ka sone.

Baruti ba ne ba rapedisa  dikgwetlho tsa lefatshe leno jaaka COVID-19, HIV/AIDS, dikotsi tsa tsela, botlhoka tsebe, go ikgapela matshelo, kagiso mo malwapeng le lefatshe ka bophara, le melelo e e dikileng e jele naga, dimela le ditshidi.

Moruti Omuni Gotlop wa UCCSA o ne a kgothatsa batsena thapelo eo go ikanya Modimo ka e le one ‘botshabelo le thuso e e gaufi mo tlalelong’ mme ba seka ba ngodiega ba tie mo thapelong le gone go tsepama mo lefokong la Modimo ka e le ene phodiso, tsholofelo le katlego mo dikgwetlhong tsotlhe. 

O ne a tlhalosa fa ka nako ya bolwetsi bo simologa mongwe le mongwe a ne a tlelwa ke poifo, ketsaetsego le boitlhobogo ka jaana ba ne ba tshwanelwa ke go tsena mo dirubing.

O boletse fa ka ntlha ya thapelo Modimo o ne wa reetsa selelo sa batho mme wa kokobetsa bolwetse.

A re setshaba se seka sa tlhobaediwa ke sepe mme ba ise ditopo tsa bone kwa Modimong ka thapelo, a nopola mo lokwalong lwa Bafilipi 4:6-7.

Mongwe wa banana Rre Onkemetse Seremane o ne a kgothatsa banana ka ene go ikaega ka lefoko la Modimo ka le go ikgapha mo go direng tse di duleng mo tseleng ka di ka ba kgaoganya le Modimo.

A re ‘poifo Modimo ke tshimologo ya botlhale,’ ka jalo a rotloetsa banana go tlhagafalela go itse Modimo e seng go mo gopola fela fa go le botlhoko.

Fa a amogela batsena dithapelo mo kgotleng, Kgosi David Megano ll o ne a re go botlhokwa go leboga Modimo ka nako tsotlhe ka go babalela setshaba ka nako ya segajaja sa COVID-19 se se neng se apesitseng lefatshe kobo ka letshoba.

A re Modimo o tshwanelwa ke ditebogo ka a kgona go fetola dikeledi tsa kutlobotlhoko go nna tsa boitumelo. 

O ne a leboga morafe, a re letsatsi leo le supa fa ba na le tsholofelo le tumelo ya gore diphetogo di tlaa nna teng mo setshabeng. BOKHUTLO