16 Jun 2022

Banni ba Sefhare ba lebogetse thuto ka tiro ya palamente le tshwanelo ya mopalamente wa bone.

Banni ba ntshitse malebo ao moraga ga motsamaisa-dipuisano tsa Palamente, Rre Phandu Skelemani a se na go ba tlhatlhalela ka tiro ya ntlo kgolo eo.

Rre Skelemani a re o bone gole botlhokwa go tsamaya le lefatshe a ruta setshaba ka tiro ya palamente, le lenaneo la “Botswana Speaks”- le le lomaganynag ditirelo tsa Palamente le setshaba ka maranyane. A re maikaelelo a mangwe a diphuthego tseo, ke go ikutlwela megopolo le matshwenyego a setshaba.

Rre Skelemani a re tiro ya palamente e tona ke go dira melao, e e ka tlhabololang matshelo a setshaba, go sena go dumalanwa ka ditshutiso tse di tlang ka mapalamente, ba ikaegile ka dikeletso kgotsa letlhoko mo di kgaolong tsa bone.

Ka jalo, o rotloeditse banni go dirisanya le mopalamente wa bone, Dr Kesitegile Gobotswang gore matshwenyego a bone a goroge sentle ko palamenteng, a re go dira jalo go ka ba thusa go nna le kemedi e maleba.

Rre Skelemani a re mapalamente gape a botsa matona dipotso ka seemo sa ditlhabololo sa dikgaolo tsa bone tsa botlhophi, le go tlisa megopolo e e kgonang go dumalanwa kgotsa go sa dumalanwe.

O gateletse botlhokwa jwa gore banni ba tllhaloganye gore bontsi jwa nako, le fa mogopolo wa mopalamente o ka tswa o le montle, palamente e kgona go sa o dumela.

Motsamaisa-dipuisano tsa palamente o tlhalosetse fa ditlhabololo di dirwa go setswe morago ditogamaano, ka jalo puso e simolola go loga maano, fa megopolo e amogetse mo mapalamenteng.

Rre Skelemani a re megopolo e kgona go seegwa go fitlhela go nna le madi a lekaneng go e dirafatsa.

Fa a tswa la gagwe, Dr Gobotswang o ne a lebogela Rre Skelemani go bo a iphile sebaka go tsamaya le lefatshe a ruta setshaba ka tiro ya palamente gore ba kgone go tllhaloganya ditiro tsa mapalamente a bone.

Morago ga phuthego, Rre Skelemani, yoo neng a patilwe ke Mokwaledi wa palamente, Mme Barbara Dithapo le Mogakolodi wa tsa melao wa palamente, Rre Linchwe Tlhowe, o ne a etela kokelwana e kgologolo ya Sefhare, e e ntshafaditsweng,  ofisi ya mopalamente le tiro e e tsweletseng ya mosele wa kgopo ya metsi a leswe. BOKHUTLO