15 Jun 2022

Moeteledipele wa Botswana Pantsula Association o kopile setshaba go amogela mokgatlho wa bone o maikaelelo a one eleng go thusa puso go lwantsha botlhokatsebe le kgokgontsho ya bong.

Rre Peter Modise o buile se kwa Kanye ka Matlhatso jaaka fa ba ne ba abela Gamaila Real Pantsula Branch setlankana sa go nna leloko la mokgatlho o motona wa Botswana Pantsula Association.

Rre Modise o tlhaositse fa maloko a mokgatlho wa mapantsula e se magodu jaaka bontsi bo akanya. 

O gateletse thata gore ba itebagantse  le go aga maloko a mokgatlho fa ba lemoga fa mongwe wa bone a tswa mo tseleng.

O ne a kopa maloko go inaakanya le magosi, mapodisi ga mmogo le barutabana, ka maikaelelo a go aga bana le go ba rotloetsa go ikgapha mo botlhoka tsebeng.  O supile fa ba ne ba tumile ka go tsamaya ka dithipa, mme a supa fa ba emisitse go dira jalo ka gore di ne di ba senya leina.

Rre Modise a re ba na le  dikgaolo di le masome a mane le bobedi mono gae, e bile toro ya bone ele go bona di tshwere ka thata go latedisa maikaelelo a mokgatlho. A re mokgatlho wa bone o kwadisitswe semmuso, ebile ba na le molao motheo.

Fa a leboga modula-setilo wa Gamaila Pantsula Rre Kabelo Tsalaile are go a nametsa go bona mokgatlho o gola. 

A re ba tla tswelela ka go inaakanya le dikomiti tsa motse go bona ka fa ba ka thusang ka teng, a tlhalosa fa ba setse ba kile ba ya go phepafatsa kwa motseng wa Moshana ka maikaelelo a go rotloetsa tikologo e e phepa.  BOPA