05 Jun 2022

Lekgotla la kabo ditsha la Palapye le tsweletse ka go aba ditsha morago ga lebaka le leleele go sa bewe ditsha.

Fa a bua kwa Radisele ka Labone, modulasetilo wa lekgotla la kabo ditsha la Palapye, Rre Isaac Maforaga o tlhalositse fa ba itlamile go aba ditsha di le 1 892 kwa kgaolong, mo mafelong a a farologaneng.

Rre Maforaga o ne a lekodisa baikopedi ba ditsha ba ba neng ba ile go bewa ditsha kwa Radisele gore ba ya go aba ditsha di le 540 kwa motseng .

A re maikaelelo ke go baya ditsha tsa bonno kwa Palapye, Radisele, Lerala, Majwaneng, Ratholo le Mokungwane go simolola Seetebosigo go tsena Sedimonthole

O ne a ba lekodisa ka melao e mesha, wa Tribal Act wa 2018 o o tlhalosang ka tiriso ya lefatshe, se e le go ba lemotsha ka diphetogo tse di teng.

Rre Maforaga o ne a ba itsise fa mo molaong o mosha, go sa tlhola go tlhokiwa gore motho fa a fetisetsa setsha kwa go yo mongwe a bo a se tlhabolotse. Le fa go ntse jalo, o ba itsisitse fa go dira diphetogo tseo motho a lopiwa madi a a kanang ka P3 000.

O tlhalositse fa Radisele a ne o wela mo lekgotleng la kabo ditsha la Mahalapye, mme phudugo ya teng e ne ya ba baya ka fa mosing ka dikopo dingwe di ne tsa salela kwa Mahalapye mme se sa baka gore baikopedi bangwe ba salele kwa morago.

Rre Maforaga o ne a tlhalosa fa baikopedi ba ba saletseng kwa morago ka go bo ba seo mo moleng fa ba tlaa baakanya seemo sa bone.

A re ba kopile gore ba ikwale maina ba ntshe le bosupi gore ba tle ba baakanyediwe mme ba tlaa thusiwa go setswe tsamaiso ya lekgotla la kabo ditsha morago.

O tlhalositse fa tsamaiso ya lekgotla la kabo ditsha e le go abela batho, go tswa mo go reng yo o ikopetseng pele e nne ene a neelwang pele.

Moanamisa mafoko wa lekgotla la kabo ditsha la Palapye, Mme Kealeboga Malaolo o tlhalositse fa go tlaa bewa baikopedi go simolola ka ba ngwaga wa 2003 go fitlha ka ba 2008. Fa a tswa la gagwe Kgosi Shathani Mmereki wa Radisele o tlhaloseditse baikopedi fa lekgotla la kabo ditsha le ba arabile ka bontsi bo sa bolo go tsenya dikopo tsa ditsha.

Kgosi Mmereki o ne gape a re o tshwenngwa ke seemo sa gore le mororo ba ntse ba lela ka tiego ya peo ya ditsha, bangwe ba bone ba ya go di rekisa mme ba sena bonno. BOKHUTLO