23 May 2022

Barutabana le batsadi ba motse wa Maape mo kgaolong ya Tswapong Bokone, ba sa tswa go ipelela go tsabakela mo maduong a lokwalo lwa botlhano (BGCSE) a 2021, a ga Rre Katlo Kose.

Fa bua ko moletlong oo neng o tshwerwe ka Matlhatso ko motseng oo, Rre Phodiso Baitseng o supile fa ngwana yo a tsholeditse serodumo sa  Maape ka a ne a ipelelwa lefatshe lotlhe gammogo le Lephata la Thuto.

Rre Baitseng a re ke ka moo ba gwetlhegileng gore le bone e le batsadi ba Maape, ba ipelele Rre Kose yo tsabaketseng jaaka naledi ka maduo a 48 points, 6A*3As go tswa kwa sekoleng se se segolwane sa Madiba.

A re se ke go tiisa mooko Rre Kose le balekane ba gagwe ba babedi ba le bone baneng ba mo loma serota, e bong Thebe Ngongorego ka 44 points le Rre Tshiamo Lekadiba ene a bone 43 points .

A re moletlo o, o e leng lantlha o tshwarwa, o tla thusa go neela bana bogakolodi le maele jaaka ba tlaa bo baya ko dikolong tse dikgolwane.

Rre Baitseng o ne a ba rotloetsa gore se ba se simolotseng ba se tsweledise ka gore go solofetswe gole gontsi mo go bone. O ne a ba gakolola gore ba tlhomame mo dithutong tsa bone, mme ba seka ba inaakanya le dilo tse dika ba ntshang mo tseleng.

Rre Baitseng o ba gakolotse gore ko bayang dikolong teng, gona le dilo tse dintle tse dintsi, mme di le kotsi mo matshelong a bone, a kopa gore ba ikgaphe mo go tsone, jaaka bojalwa, ditagi, go tsena mo maratong le botlhoka tsebe.

Fa a tswa la gagwe, mogokgo wa sekolo se sebotlana sa maape, Mme Dimpho Motshabi a tlhalosa fa ale motlotlo thata ka jaana bana ba ele ba ba neng ba dira lokwalo lwa ntlha fa a goroga kwa sekolong seo.

Mme Motshabi a re nako tsotlhe o latedisa maduo a bana kwa dikolong tse dikgolwane, go bona gore a ba tsweletse ka go dira sentle.

A re erile go bona bana ba dirile sentle, a gwetlhega mme a lekodisa barutabana, PTA le bogogi jwa motse gore o eletsa gore ba ipelele bana ba.

O ne a leboga batsadi ba bana, a re ba ba godisitse sentle ka fa tlase ga molao, ba na le seabe se segolo mo thutong ya bana ba bone.

Mme Motshabi o ne a rotloetsa bana gore ba ye go tswelela ba itshwere sentle gore ba fitlhelele tse dintle tse ba di batlang mo botshelong.

Fa a tswa la gagwe, naletsana Kose a re thuto ke pitsa ya maoto a mararo ebong motsadi, ngwana le morutabana.

A tlhalosa gore motsadi ke ene pinagare.

Rre Kose o ne a re o leboga nkukuagwe go menagane, ka go mo godisetsa mo tumelong, e a reng e fenya lefatshe. A tlhalosa gore tumelo ke yone e ba kgontshitseng. O ne a lebogela barutabana ka dikgakololo tsa bone.

Fa a ntsha la gagwe la kgothatso, mokhanselara wa kgaolo ya Pilikwe/Maape, Rre Kebadirile Ngongorego o rotloeditse bana go ikanya tumelo ka gore e ka ba faposa dikotsi le dikgwetlho tsa lefatshe.

Rre Ngongorego o ne a ba gakolola gore ba dirise thotloetseo le dikgakololo tse ba difilweng ke batsadi le barutabana gore ba kgone go tsweledisa go tsabakela ga bone mo thutong go ya pele.

O ne a akgola barutabana ba sekolo se se botlana sa Maape, a re ba tsweletse ka go dira ka natla mo tirong ya bone le ntswa ba na le dikgwetlho.

Rre Ngongorego a re barutabana ba sekolo se ba tlhoka go lemogiwa ka mo go faphegileng, gammogo le komiti ya PTA.

Rre Kose o abetswe mpho ya Laptop ee tswang ko Khamphaning ya Botswana Insurance Fund Management (BIFM). Dingwe dimpho tse a di abetsweng ke setshaba di akaretsa setlankana le madi a kanang ka P450 le kobo mongwe le mongwe wa bone. BOkhutlo