16 May 2022

Kgosi Tsholo Segwagwa wa Kaudwane a re majalwa a a dirwang mo malwapeng a borai fela thata mo matshelong a batho.

E rile a bua mo potsolosong le BOPA bosheng, Kgosi Segwagwa a supa fa batho ba le babedi ba setse ba tlhokafetse, morago ga go nwa majalwa a mofuta oo.

A re le ntswa a sa tlhomamisa gore e go tsenngwa eng mo majalweng ao, go supega fa a le bogale fela thata, mme mangwe a felela a le botlhole mo mebeleng ya banwi ba one.

Kgosi a re ka bontsi jwa morafe bo sa bereke, ba felela ba itirela majalwa mo malwapeng go rekisa, mme bangwe ba tsenye metswako e e borai.

A re ba ne ba felela ba bitsa phuthego go buisana ka dikgang tsa majalwa ao, e le tsela nngwe ya go gakolola ba ba a dirang ka bodiphatsa jwa one.

Kgosi Segwagwa o ne a lebogela phokotsego ya dintwa mo motseng, bogolo jang ko go nwelang bojalwa teng.

E re dikgang di eme jalo, a re ba tshwenngwa ke diphologolo tsa naga jaaka ditau le ditlou tse di tlhagileng mo terateng ya lefelo la diphologolo la Khutse.

A re ditau di ba jela leruo, fa ditlou di kgona go ralala motse mme di tsenye matshelo a morafe mo diphatseng.

O ne a lebogela morafe go obamela melawana ya ba botsogo ya COVID-19, a re  seo se babaletse matshelo a bone  fela thata. Bokhutlo