12 May 2022

Ka letlhaku le lesha le agelwa mo go le le gologolo, khansele-potlana ya Serowe e simolotse go shafatsa ditsela tsa mmolo o mogologolo wa Serowe ka madi a a tshwarang P4 million.

Go ya ka moanamisa mafoko wa khansele, Rre Onkabetse Ntwe, tiro e, e simologile ka go kaba dikhuti fa gare ga mmolo, go kgaola bojang, le go feela.

A re morago ba tlaa bo ba tshela sekontere.

A re tsholofelo ke gore tse tsotlhe di fe mmolo tebego, ka o ntse o le maswe thata metsi a dirile melatswana fa gare ga marekisetso.

Rre Ntwe a re khamphani ya Asphalt Botswana e e thapetsweng tiro e, e tlaa bo gape e dira tsela e e fetang fa motlobong wa ditso e e fetang fa Spar le e e tswang kwa ga Dennis e feta ka Spar.

A re tse dingwe tse di senyegileng thata jaaka ya Prisons ga di a bona madi mme e tlaa re fa madi a letla di dirwe.

Mo phuthego nngwe le nngwe ya khansele makhanselara ba ne ba bua ba sa kgale mathe ba lela ka go onala ga mmolo, bogolo jang ka o bapile le tsela e bajanala ba fetang ka yone ba ya Boteti le Maun.  

Khamphani ya Asphalt ke yone gape e shafatsang tsela ya Serowe-Palapye e e ntseng e le dikhutikhuti tse di bakang dikotsi. Bokhutlo