11 May 2022

Mokgatlho wa An Ideal Woman o o direlang kwa Mahalapye o gwetlhile lefatshe la Botswana go boela morago ditiro tse di kgatlhanong le molao wa Modimo.

Moemedi wa one Mme Catherine Kapo a re e re ka molao-motheo ka tsela nngwe o tsamaelana le molao wa Modimo, lefatshe leno le tshwanetse la ikela tlhoko gore le seka la tshokane le tsuolotse mantswe a Modimo.

Mme Kapo yo a neng a rolela lekoko la tshekatsheko molao-motheo megopolo ka Laboraro a re katlholelo leso ke sengwe sa tse di tshwanetseng tsa emisiwa ka e le kgatlhanong le taelo ya Modimo ya gore ope o seka a bolaya.

O kgadile gape marato a bong a re tumelo ya Sekeresete ga e a amogele. Go sale foo, o ne a tlhalosa morago mo potsolotsong gore go ya ka tumelo ya Sekeresete, mebala ya botala jwa loapi le o mosweu e e mo folageng ya Botswana di emetse kagiso le go itsheka, ka jalo go botlhokwa gore tshaba ya

Botswana e seka ya ikamanya ka gope le ditiro dipe tse di ka sekeng di tsamaelane le maikemisetso ao.

Moemedi wa mokgatlho wa ba-na-le bogole wa leina la Diponeng, Rre Motsholetsi Tlhaloganyo o ne a kopa gore maemo a mookamedi wa ofisi ya ditirelo tsa ba-na-le bogole kwa Ofising ya ga Tautona a beelwe ba-na-le bogole ba le bosi.

A re go tshegediwa ga maemo ao ke motho yo o sa tsheleng ka bogole ga go a lebana, ka motho wa go nna jalo a ka seke a kgaratlhele ditshwanelo tsa bone mo go lekaneng ka a sa tlhaloganye dikgwetlho tsa go tshela ka bogole.

Rre Tlhaloganyo a re ba-na-le bogole botlhe ba fiwe lemme la itshetso go sa kgathalesege gore bogole jwa bone ke jwa mohuta ofe.

Rre Tsogo Bonang wa mokgatlho wa Mahulantsweng o o itebagantseng le tsa ngwao o ikuetse mo pusong go lemoga botlhokwa jwa mekgatlho ya bopelotlhomogi, segolo jang seabe sa yon emo go rotloetseng mowa wa boithaopo.

O kopile gore molao o tlame puso go ema mekgatlho eo nokeng gore e tle e kgone go fitlhelela maitlamo a yone. Fa a bua boemong jwa lekgotla la dikgosana tsa kgaolo-potlana ya Mahalapye, Rre Kobamelo Maunatlala o ne a kopa gore leina ‘kgosana’ le seka la tswelela le dirisiwa ka le supa nyenyafatso e seng fela mo go yo o tshegeditseng maemo ao, mme le mo morafeng o a o eteletseng pele.

A re dikgosana di tshwanetse tsa bidiwa dikgosi mme ba farologanngwe ka maemo a bone jaaka go ka twe kgosi wa tletlanyo. Rre Maunatlala a re gape go tshwanetse ga tlhongwa lephata le lesha le le tlaa okamelang dikgosi le Ntlo ya Dikgosi.

A re go botlhokwa gore Ntlo ya Dikgosi e tswe ka fa tlase ga Ofisi ya ga Tautona mme e tsene ka fa tlase ga sekhukhu se le sengwe le dikgosi kwa dikgaolong ga mmogo le ditiro tsotlhe tse di amanang le bogosi.

Moemedi yoo a re go nna teng ga letlole le le lebaganeng le merero ya bogosi go ka tlotlomatsa tiro ya dikgosi ga ba ga di nonotsha go ka direla lefatshe leno ka natla. BOKHUTLO