31 Mar 2022

Barui ba rotloeditswe go isa dikgomo tsa bone kwa lefelong la kgwediso ka seatla go le tlhabolola gore ba nne le letsopa le le nonofileng e bile le na le boleng.

Mo potsolotsong le BOPA bosheng, mogolwane kwa polaseng ya Morupule ya kgwediso ka seatla go bapa le Serowe, Rre Lebogang Ramaloto o boletse fa dikgomo tse di tlhabolotsweng di na le bokete jwa nama le go kgatlhisa.

Rre Ramaloto o boletse fa barui ba itsapa go isa dikgomo kwa kgwedisong ka seatla ka mabaka a a farologaneng, jaaka bangwe ba lela ka dikoloi tse di pegang dikgomo.

A re morui ke ene a itlhophelang gore dikgomo tsa gagwe o batla di gwedisiwa ka moroto wa poo efe e a e ratang.

Mo nakong ya gompieno, ba setse ba tlhatlhetse dikgomo di le makgolo a mane le masome a marataro le botlhano, e bile ba setse ba gwedisitse dingwe tsa tsone.

O boletse fa go na le dikgwetlho kwa polaseng eo, ka e tlhaelelwa ke bodiredi ka gore dikgomo di a disiwa e bile di a fepiwa ka nako e phulo e tlaa bong e sa kgotsofatse.

O boletse fa terata ya polase go na le fa e leng makgasa teng, mme a kopa babereki go nna kelotlhoko ka gore dikgomo tsa batho di ka halala.

Dikgomo tse di isiwang teng ke tse di tswang mo merakeng e e mo tikologong ya Serowe, Palapye le Tonota.

A re bontsi jwa barui ba na le keletso ya go tswakanya leruo, ba dira matsopa a segompieno a a eletsegang. Bokhutlo