14 Mar 2022

Banni ba Dimajwe le Mmashoro ba kopilwe go tsaya karolo mo tshekatshekong ya molao-motheo, ka e le tshwanelo ya bone. 

Mopalamente wa Serowe Bophirima, Rre Tshekedi Khama o dirile kopo eo fa a buisa diphuthego tsa kgotla kwa metseng eo bosheng. 

Rre Khama a re lekoko la tshekatsheko ya molao-motheo le tlhokana le megopolo ya Batswana, ka jalo ba seka ba tshaba go ntsha ya bone, a re e ka thusa thata. 

O ba gwetlhile go ntsha tse di ba tshwenyang mo molao-motheong, le gore di ka baakanngwa jang. 

Rre Khama o ne gape a rotloetsa banni go tsaya mokento wa COVID-19, a re ba botsogo ba supile fa batho ba tla ka go rotha, bogolo jang go tsaya mokento wa tlaleletso.

Fa ba tswa la bone, banni ba ne ba supa matshwenyego ka tsela e e tshwaraganyang Dimajwe le Mmashoro, ba bolela fa e na le dingwaga e sa gopiwe.

Ba re seemo sa tsela eo se ba rontsha ditlamelo dingwe. 

Kgosi Kebonemang Kebadiretse wa Dimajwe o ne a kopa khansele go gopa tsela eo. 

A re ga ba kgone go tsisediwa didirisiwa tsa kago mahala jaaka pele, ka beng ba madirelo a ba rekang mo go one ba supa fa tsela eo e senya dikoloi tsa bone, ka jalo ba felela ba duela dikoloi tsa batho go ba thusa. 

Kgosi Kebadiretse a re ntlha e nngwe e e ba tshwentseng ke go tlhoka ditsha tsa bonno, a re bontsi jwa bone ba felela ba nna ba le bantsi mo malwapeng, mme seo se feletse se baka dikgotlhang. 

Modulasetilo wa komiti ya ditlhabololo tsa Mmashoro, Rre Goemeone Ratonki o ne a itsese mopalamente fa go na le bothata jwa letlhoko la matlo a boroko jwa badirelapuso. 

A re bangwe ba felela ba nna kwa Serowe, mme se se ka feletsa se dira gore maduo a sekole a koafale. 

Modulasetilo wa lekgotla le lebotlana la kabo-ditsha la Paje, Rre Thapelo Dithebe o ne a supa fa lekgotla le lone le tshwenngwa ke kgang ya go tlhoka ditsha, e a reng e aname lefatshe ka bophara. 

O ne a tlhalosa fa lekgotla le santse le emetse mealo go tswa kwa khanseleng-potlana ya Serowe, a ba kopa gore ba seka ba fela pelo ka ditsha di tlaa ajwa. Bokhutlo