06 Mar 2022

Kgotla ya Mmakaseterata kwa Serowe e ganne go fa mmelaelwa mo kgetsing tsa petelelo di le lesome le boraro (13), Thapelo Disele sebaka sa go letela tsheko a le kwa ntle ga kgolegelo.

Disele wa dingwaga tse di masome mararo le bongwe (31) wa kgotla ya Maaloswana mo Serowe o itshupile fa pele ga lekgotla ka Labone, ka kopo ya gore a fiwe sebaka sa go letela tsheko a le kwa ntle ga kgolegelo.

Mekwalo e beilweng lekgotla pele ke ba bosekisi, e tlhalosa gore Disele o lebisitswe melato ele lesome le boraro ya petelelo. Dipelaelo ke gore Disele o ne a dirisa dikgoka le go tshosetsa bangongoregi ka thipa pele a itseela dikobo ka dikgoka.

Mo godimo ga moo, ba bosekisi ba tlhalositse gore mmelaelwa o ne a amoga batswa-setlhabelo dithoto di akaretsa madi le megala ya letheka.  

Melato eo, go belaelwa e diragetse magareng ga ngwaga wa 2021 le wa 2022 mo mafelong a farologanyeng mo Serowe, a akaretsa dikgotla tsa Maaloswana, Makolo, Masilo, Dinokwane le Mokwena.

Mo ikopelong ya go letela tsheko a le kwa ntle ga kgolegelo, Disele o tlhaloseditse lekgotla gore o na le kgwedi a ntse a tshegeditswe mo kgolegelong.

A re go letela tsheko a le ko ntle go tla mo fa sebaka sa gore a kgone go batla mmueledi.

Le fa go ntse jalo lekgotla le ne la dumalana le kopo ya motsamaisi wa tsheko gore mmelaelwa a name a tshegeditswe mo lekgotleng ka mabaka a gore ditlhotlhomiso di santse di tsweletse.

Mmakaseterata, Mme Waniwa Ngebani o supile gore keletso ke gore batlhotlhomisi ba kgone go dira tiro ya bone ka matsetseleko ba sa kgopakgopediwe.

Mme Ngebani o tlhalositse gape gore bontlha bongwe jwa bosupi jo bo tla dirisiwang mo dikgetsing tse bo santse bo rometswe kwa bakanoki go seka-sekwa mo go tseneletseng.

Ka jalo o tla nama a emetse tsheko ale mo kgolegelong. O tla itshupa gape fa pele ga lekgotla kgwedi eno ele masome mararo le bongwe mo mosong.

Mo tshekong e nngwe, Tsholofelo Makgetho o atlholetswe dingwaga tse di lesome mo kgolegelong ka melato ya pelaelo le go dirisa dikgoka.

Mmakaseterata Ngebani o tlhalositse gore Makgetho o dirile molato o masisi ka jalo o tshwanetse a gagamaletswa kotlhao gore ba bangwe ba bone ka ene gore go dira molato ga se selo se se molemo le gore ba seka ba nna le keletso ya dirisa ope mo tlhakanelong dikobo ntle le tumalano.

Lekgotla le supile gore go tshwanetse ga papamala gore petelelo ke selo se se bosula le gore batswa-setlhabelo ba amega thata mo maikutlong botshelo jotlhe. Bokhutlo