06 Mar 2022

Modiri wa lephata la dikitsiso, Bidirile Katholo o bolokilwe mo Maun ka Matlhatso.

Katholo, yo o neng a direla kwa ofising ya Gumare e le mokgweetsi, o tlhokafetse kgwedi ya Tlhakole e le masome a mabedi le bosupa a le dingwaga tse di masome a matlhano le bosupa morago ga go lwala ka lebaka.

O simolotse go berekela lephata la dikitsiso ka ngwaga wa 2017 a ne a kile a berela kwa maphateng a mangwe a Food Resources le ofisi ya District AIDS Coordinator.

Dibui ka go farologana di kaile fa Katholo e ne e le motho yo o lorato, boikobo ebile a na le botlhale jwa bogakolodi.

Mongwe wa dibui, moemedi go tswa kwa lephateng la dikitsitso mo Maun, Rre David Moeng o ne a supa fa Katholo a ne a rata bophepa ebile a itse go itlhokomela.

Rre Moeng a re Katholo o ne a le botlhokwa thata mo tirong ka a ne a na le maitemogelo a kgaolo ya Ngamiland ka jalo a ne a kgona go fa bogakolodi ka tsa tiro le matshelo ka go farologana.

O supile fa Katholo a ne a rata ya gagwe ka jalo a ne a bereka ka boineelo le ntswa kgaolo eo e le bophara ebile e na le dikgwetlho.

Rre Molebatsi Barataesi go tswa kwa bogwagwadi, o ne a kaya Katholo e ne e le motsadi yo ba neng ba ithuta go le gontsi mo go ene ebile e le motho yo o boamaaruri a sa buele ko thoko.

Ngwana wa ga Katholo, Mme Leatile Katholo ene o ne a re rraagwe o ba rutile go nna lorato, botho le go tshwara batho ka tekatekanyo.

Mme Katholo a re rraagwe o ne a batla gore ba tsamaye mo tseleng e e siameng ebile a ba godisetsa mo tumelong.

Rre Basokolodi Kesebetswe, moemedi go tswa kerekeng ya Apostolic Sabbath Day e Katholo a neng a e okametse e le moruti, o ne mo kaya e le motho yo o neng a rata boammaaruri le gore dilo di tsamaye sentle mo kerekeng.

Rre Kesebetswe a re Katholo o ne a le boineelo ka o sa le a tsena kereke eo e le lekau go fitlha a golela mo go yone, a re le fa a ne a kopana le dikgwetlho o ne a seka a e tlogela. Bokhutlo