01 Mar 2022

Bolwetse jwa kankere ya popelo wa molomo ga se pheletso ya botshelo.

Se se builwe ke Mme Mathudi Moremi yo o tlholegang kwa Mochudi.

O boletse fa re erile ka ngwaga wa 2016 a itemogela diphetogo tse di sa tlwaelesegang mo mmeleng wa gagwe.

Are diphetogo tse di ne di akaretsa metsi a a monko o o sa tlwaelesegang o tswa ka fa bosading.

Go ya ka Mme Moremi yo o dingwaga di masome a matlhano le bone, go ne go se bonolo go itsise rre ka monko o, ka jalo tlhakanelo-dikobo e ne ya nna thata.

“Go ne go le thata go itsise rre wame ka seemo se ka ke ne ke le mo tsietsong, ke ise ke tlhaloganye gore bothata e katswa ele eng,” Mme Moremi a bua jaana a tlatsa ka gore le bana mo lapeng o ne a ba lobela seemo se.

Mme Moremi are mo tsamaong ya nako, o ne a tsaya tshwetso ya go itekodisa kwa kokelong kwa baoki ba neng ba belaela fa a na le malwetse a dikobo ka jalo a neelwa kalafi ya malwetsi ao.

O tlhalositse fa kalafi e ne ya seke ya mothusa ka monko le ntswa a ne a ya kokelong seboa-boane.

Are le fa go ntse jalo, erile ka ngwaga wa 2016 a dira ditlhatlhobo tsa pap smear mme morago ga ditlhatlhobo tse di tseneletseng maduo a supa fa a na le kankere ya molomo wa popelo.

Are kankere e ya molomo wa popelo, e ne e setse e le mo legatong la boraro. Mme Moremi are o ne a tshela ka makoa mo mmeleng jaaka ditlhabi, go tswa madi a mantsi, metsi aa nang le monko le go tlhoka keletso ya dijo.

Are erile ka kgwedi ya Tlhakole ngwaga wa 2017, a robatswa kwa kokelong ya Princess Marina mme morago a fetisetswa kwa kokelong ya Gaborone Private.

Mme Moremi are o ne a robatswa dibeke di le thataro mme a fiwa kalafi ya Chemotherapy le Radiation. O supile fa erile ka ngwaga wa 2018 morago ga kalafi a ikgolaganya le mokgatlho wa Fighters Support Group yo eleng mokgatlho wa botlhe ba ba amilweng ke bolwetse jwa kankere.

Are mokgatlho o ne wa mo thusa go ikamogela le go mo nonotsha mo tumelong ka a kopana le bafenyi ba bolwetse jwa kankere ka go farologana.

Are o raletse dikgwetlho le matlhoko a a tliseditsweng ke bolwetse jwa kankere ya molomo wa popelo, ke ka moo a eletsang go rutuntsha setshaba bogolo jang bo mme ka bolwetse jo.

O rotloeditse bo mme go itekodisa gangwe le gape kwa go ba bongaka go itse seemo sa bone sa botsogo.BOKHUTLO