28 Feb 2022

Mokhanselara wa Maunatlala Mme Salome Lesome o abetse bana bale bane ba sekole sa Maunatlala  JSS ba ba pasitseng ka maemo a ntlha mo ditlhatlhobong tsa makgaolakgang tsa lekwalo la boraro dimpho.

Fa a amogela dimpho tseo bosheng mogokgo wa sekole , Rre Kebame Montwedi  one a leboga Mme Lesome go bo a eme sekole sa bone nokeng ka nako tsotlhe.

Rre Montwedi o ne a tlhalosa fa Mme Lesole a itlamile gore ngwaga le ngwaga o abela bana ba ba pasitseng ka maemo a ntlha le go feta madi a kana ka P1 000 mongwe le mongwe.

Rre Montwedi o ne a akgola le bana go bo ba tlogetse ba itiretse leina mo sekoleng ka go dira sentle mo dithutong tsa bone.

A re bana ba, ke basimane ba babedi le basetsana ba babedi, a supa fa ene ele bana ba ba nang le boitshwaro jo bo siameng  a re fa go na le boitshwaro le botho jo bo elesegang  maduo a mantle a nna teng.

A re maiteko a bone a supile gore ke bana ba ba itseng se ba se batlang, a ba rotloetsa gore baye go tswelela ba dira ka thata gore ba fitlhelele ditoro tsa bone.

Rre Montwedi a re bana ba, ba kgonne go pasa le ntswa sekolo sa bone sene  sena  le dikgwetlho tsa botlhoka tsebe le COVID-19.

O ne a ba gakolola gore le kwa ba ya teng ba diheme dikgwetlho ka boitshwaro jo bo siameng  jo ba neng ba bosupa . O ne a akgola  batsadi ba bana ba a re ba agile  motheo o nonofileng  wa kgodiso ya bana.

Fa a rola dimpho Mme Lesole a re go botlhokwa gore ele baeteledipele ba motse ba eme nokeng thuto ya bana.

Mme Lesole a re  go dira jalo ke go kgothatsa bana go bereka ka thata gore ba bone maduo aa  nametsang.

O ne a rotloetsa bana le barutabana go dirisana sentle a tlhalosa fa go le botlhokwa gore  ba-na-le seabe ka kakaretso  ba eme  sekolo nokeng go hema diemo tse di teng.

Modulasetilo wa komiti ya dtlhabololo tsa motse wa Maunatlala Rre Opelo Keseme o ne a supa fa tiro e ele tona ka e rotloetsa bana go iteka.

Rre Keseme o akgotse bana ba, a re  ba tsholeditse serodumo sa sekolo sa Maunatlala, a tlatsa ka gore sekole se, se alositse batho ba le bantsi ba ba tshwereng maemo a kwa godimo mo lefatsheng.

O ne a kgothatsa bana  go tswelela ba itshwere sentle  le ko bayang teng le go ikanya Modimo ka nako tsotlhe. Morutabana Mme Gabalebatse Tias le ene o ne a abela bana ba, dikobo ka maikaelelo a go ba kgothatsa. BOKHUTLO