21 Feb 2022

Lenaneo la Ipelegeng le pele le neng le tlwaelesegile ka leina la namola leuba, le tsweletse ka go thusa Batswana go itshetsa.

Ke ka moo puso e tsweletseng ka go fa dikhansele madi go tsamaisa lenaneo le, gore di tswelele ka go thapa batho go dira ditiro ka go farologana mo metseng e e ikadileng le lefatshe leno.

Kwa Ngware kwa kgaolong- potlana ya Letlhakeng, lenaneo la Ipelegeng le tsweletse sentle.

Modulasetilo wa komiti ya ditlhabololo tsa motse, Mme Mabitso Gabotshwanelwe o tlhaloseditse BOPA fa lenaneo le thapile batho ba le masome a supa le boferabobedi.

A re le fa ba eletsa gore dipalo di okediwe ka bontsi bo sa bereke, ba lebogela gore bangwe ba a bereka le fa ba tshwanetse go fapaanela pereko.

O supile fa manaeo a bone a Ipelegeng a tsweletse sentle le fa ditiro tse dingwe jaaka go tlhagola di sena tema ntateng ya pula e e ntseng e na kgapekgapetsa.

Mme Gabotshwanelwe a re ba agelela masimo a Magotshane, sebe sa phiri ke gore go na le bangwe ba ba kgaolang terata, seo e bo e nna poelo morago.

A re ba leboga khansele-potlana ya Letlhakeng go thusa batlhoki ka go ba agela matlo a le mararo ka bonno bo le botlhokwa.

Le fa go ntse jalo, modulasetilo a re ba tshwentswe ke dikotsi tse di diragalang mo tseleng ya Ngware-Diphuduhudu, a tlhalosa fa go nnile le dikotsi di ka supa ngogola mo tseleng eo mme mabaka e le tlhaga le ditlhare tse di setseng di godile mme go bo go nna thata go bona yo mongwe fa a tswa kwa pele.

Mme Gabotshwanelwe o supile fa ba ne ba ikgolaganya le lephata la ditsela mme ba supa fa ba santse ba sena madi a go baakanya tsela eo. ENDs