09 Feb 2022

Mapodisi a Middlepits mo kgaolong ya Kgalagadi borwa a tlhotlhomisa tiragalo e mo go yone ngwana wa dingwaga tse di lesome le bobedi a ikaleditseng kwa Kolonkwaneng ka Matlhatso.

Mo potsolotsong le BOPA ka Labobedi, mookamela mapodisi a Middlepits Assistant Superintendent Kebadire Mmopi, a re ba amogetse kgang eo ka Matlhatso ba e begelwa ke kgaitsadie mosimane yoo.

A re moswi yo o neng a dira lekwalo lwa bosupa kwa sekoleng se se botlana sa Kolonkwaneng o ne a ya dithutong tsa mafelo a beke ka Matlhatso le balekane ba gagwe.

Morago ga sekolo a apola paka ya sekolo fela sentle go ya go tshameka le ba bangwe.

Mo sebakeng se se khutshwane ditsala tsa gagwe tsa tla go itsese kgaitsadie ka se mosimanyana yoo a se dirileng.

Asst Supt Mmopi a re kgaitsadie a ragogela kwa lefelong la tiragalo, mme a fitlhela a ikaleditse sekgala sa 200 meters go tswa fa lelwapeng la gagabo.

Mo nakong eno go santse go sa itsewe se se bakileng tiragalo eo.

Moswi o ne a nna le mmaagwe le kgaitsadie wa dingwaga tse masome a mabedi le bone.

Go bolelwa fa ka Labotlhano mosimanyana a ne a lofela sekole a bolela fa borokgwe jwa gagwe jwa paka sekolo bo sa tlhatswiwa.

Mme mmaagwe o bolela fa a ne a mo kgalemelela seo, ka jalo ka Matlhatso a ya sekolong fela sentle.  

Go santse go ise go tlhomamisege gore go ka tswa go diragetse eng ka a sa tlogela mokwalo kana sepe fela se se ka tlhalosang gore ke eng a ikgapetse botshelo.

Ditlhotlhomiso tsa mapodisi di santse di tsweletse fa serepa sa mosimanyana sone se le kwa setsidifatsing kwa sepatela sa Tsabong.

Rre Mmopi o gakolotse gore bana ba tshwanetse ba kgalemelwa ka go siselwa.

A re ba kgalemelwe go sekegelwa mafoko a a dirisiwang mme ebile go seka ga dirwa phetelela.

O tlhalositse gore tiragalo eo e le ya ntlha e diragala monongwaga mme ngogola go nnile le tiragalo ya mofuta o e le nngwefela e mo go yone monna mongwe wa modisa a neng a itseela botshelo kwa morakeng mongwe mo kgaolong eo. Bokhutlo