02 Feb 2022

Mapodisi a Maun a tlhotlhomisa kotsi ya koloi e mo go yone bapalami ba le bane ba tlhokafetseng.

Kotsi eo e diragetse ka Labotlhano beke e e fetileng kwa Maun fa kgotleng ya boseja gaufi le dipone tse di laolang pharakano tse di fa marekisetsong a leokwane a Caltex.

 Se se builwe ke Mogolwane wa mapodisi a Maun Superintendent Chenamo Orateng mo potsolotsong.

Superintendent Orateng o tlhalositse fa ditlhotlhomiso di sa ntse di tsweletse go batisisa se se ka tswang se bakile kotsi eo.

A re mapodisi a ne a tsibogela pego ya kotsi eo mme ba ragosetsa bapagami bao kwa kokelong kwa go fitlhileng ga rurifadiwa fa ba tlhokafetse ke ba bongaka.

A re koloi eo ya modiro wa Lexus ene e na le bapalami ba le bane le mokgweetsi mme ka go tlhoka Lesego ga tlhokafala bapalami botlhe.

Superintendent Orateng a re go tlhokafetse bomme ba le babedi, yo mongwe o dingwaga tse masome mabedi le bone fa yo mongwe a le dingwaga tse di masome a mabedi le bongwe le borre ba le babedi ba dingwaga tse di masome a mabedi le botlhano.

O gakolotse bakgweetsi go kgweetsa ka keletlhoko le ka lebelo le le lekanetseng go hema dikotsi. BOKHUTLO