26 Jan 2022

Sekole se sebotlana sa Bogogobo kwa kgaolong ya Kgalagadi Borwa se itlhomile kwa setlhoeng sa dikole tse dingwe tse di masome mane le bongwe kwa kgaolong ya Kgalagadi mo maduong a ngogola a lokwalo lwa bosupa.

Mogolwane kwa lephateng la thuto go tswa kwa moding kwa kgaolong ya Kgalagadi Borwa, Rre Daniel Zulu o tlhaloseditse BOPA mo potsolotsong fa maduo a lokwalo lwa bosupa a ngogola a tokafetse.

A re matshwao a ABC a tokafetse go nna 70.9 per cent fa go tshwantshanngwa le a 2020 a 64.7 per cent kwa kgaolong ya Kgagadi Bokone.

Rre Zulu o ne a tlhalosa fa dikole tse di kwa kgaolong ya Kgalagadi di le masome mane le bobedi mme sekole sa Bogogobo se di goga kwa pele ka maduo a a kgatlhisang a lokwalo lwa bosupa ka 100 per cent fa mo lefatsheng ka bophara se le mo maemong a borataro mo dikoleng di le 826.

O boletse fa dikole tsa kgaolo ya Kgalagadi Borwa di dirile botoka go gaisa tse di kwa kgaolong ya Kgalagadi Bokone.

Rre Zulu a re sekole sa Bogogobo se longwa serota ke sa Bokspits ka 88.2 per cent se latelwa ke Nhake ka 86.6 per cent, sa bone e le sa Omaweneno ka 86.2 per cent fa sa Gakhibana e le sa botlhano ka 84.2 per cent kwa kgaolong ya Kgalagadi Borwa.

O supile fa lephata le ne le ipeetse seelo sa 80 per cent mme dikole di fera bobedi di le kwa godimo ga seelo seo.

A re se se itumedisang gape ke gore dikole tse di kwa kgaolong ya Kgalagadi Borwa di le masome mabedi le botlhano di pasiste go feta letshwao la 50 per cent.

Rre Zulu o boletse fa mo ditshekatshekong maduo a lokwalo lwa bosupa kwa kgaolong a tokafaditswe ke go ema ka dinao ga boeteledipele, ba etela dikole tse di neng di sa dira sentle go buisana le bagokgo, barutabana, baithuti le batsadi.

Rre Zulu o akgotse batsadi ba ba ithaopileng go ema lephata la thuto nokeng, dikhamphane le maphata a puso a a tsenyang letsogo go rotloetsa thuto ka go ikabela dikole, selo se a reng se tsweletse ka go ntsha maduo a a bonalang kwa kgaolong.

O tlhalositse fa mo nakong e e fetileng, dikgwetlho tse ba neng ba kopana natso mo dikoleng tse dipotlana e ne e le baithuti ba ba tshabang sekole mme seemo se ne sa tokafala morago ga go buisana le batsadi ba tshwaragane le komiti ya batsadi le barutabana tse a supileng fa di tsweletse ka go bereka sentle.

Rre Zulu o kgothaditse boeteledipele jwa lephata la thuto go tswa kwa moding, batsadi, barutabana, ba-tsaya karolo botlhe le setshaba ka kakaretso, go tsenya marapo dinameng ba tshwaragana go nna seopo sengwe ka seo se ka thusa gore maduo a kgaolo a tswelele a kgatlha. 

BOKHUTLO