26 Jan 2022

Mapodisi a Maun a tshegeditse banna ba le babedi go ba thusa ka ditlhotlhomiso tsa molato wa bogodu jwa leruo.

Se se builwe ke mogolwane wa mapodisi a Maun, Superintendent Chenamo Orateng mo potsolotsong ka Labobedi.

Superintendent Orateng a re banna bao ba dingwaga tse di masome mabedi le bobedi le tse di masome mabedi le bone ba kgotla ya Thito mo Maun.

A re mapodisi a Maun a amogetse pego ka Tshipi bosigo, e supa fa go na le bangwe ba ba belaesegang ba bolaile dikgomo kwa morakeng mongwe gaufi le Makalamabedi.

Superintendent Orateng a re ba sepodisi ba ne ba tsibogela pego eo mme ba fitlhela banna bao ka dikgomo tse pedi di bolailwe. 

A re dithothomiso di tsweletse mme beng ba dikgomo tseo ba setse ba bonwe.

Superintendent Orateng a re bogodu jwa leruo bo a tshwenya mo kgaolong ya gagwe ya seposi ka magodu a amoga barui  leruo ka dipalo tse di kwa godimo.

Le fa go ntse jalo, o ne a re ba leboga kemo nokeng ya setshaba mo go lwantsheng bogodu jwa leruo.

A re tshwaragano ya setshaba le mapodisi e ka thusa go lwantsha seemo seo. BOKHUTLO